👥 Xodimlar

Xodimlar — kompaniyangizda platformadan foydalanadigan odamlar ro‘yxati. Shu yerdan yangi xodim ochasiz, unga rol berasiz, loyihalarga biriktirasiz va ishini kuzatasiz: nechta suhbat olib boryapti, o‘rtacha necha daqiqada javob qaytaradi, hozir onlaynmi.

Bo‘limga kim kiradi

Yon menyudagi Xodimlar bandi Admin va Menejer rollariga ko‘rinadi. Operatorlarda bu bo‘lim yo‘q — ular faqat o‘zlariga biriktirilgan loyihalarning chatlari bilan ishlaydi.

Ro‘yxat sahifasi

Jadval ustunlari:

• Xodim — ism-familiya, @foydalanuvchi nomi va rol belgisi. Avatar yonidagi yashil nuqta — xodim hozir onlayn, kulrang nuqta — oflayn.
• Email — tizimga kirish uchun ishlatiladigan pochta manzili.
• Biriktirilgan loyihalar — nechta loyihaga biriktirilgani va ularning nomlari. Loyiha nomidan keyin qavs ichida kategoriyalar ko‘rsatiladi.
• Suhbatlar — hozir shu xodimda ochiq turgan suhbatlar soni.
• Javob vaqti — mijozga o‘rtacha necha daqiqada javob qaytargani.

Hisoblagichlar

Sarlavha ostidagi kichik panel butun kompaniya bo‘yicha uchta raqamni ko‘rsatadi: Onlayn, Oflayn va Jami. Bu raqamlar filtrga bog‘liq emas — ular har doim barcha xodimlarni sanaydi.

Filtrlash va saralash

• Loyihaga qarab filtrlash — faqat tanlangan loyihaga biriktirilgan xodimlarni qoldiradi. Ro‘yxat ichida qidiruv maydoni bor.
• Rol — Barcha rollar, Menejer, Operator yoki Admin. Admin varianti faqat kompaniya egasiga ko‘rinadi.

Biriktirilgan loyihalar, Suhbatlar va Javob vaqti ustun sarlavhalari bosiladi: birinchi bosishda kattadan kichikka, ikkinchi bosishda kichikdan kattaga saralaydi. Sahifaning pastidagi Sahifadagi qatorlar ro‘yxatidan 10, 20, 30 yoki 50 qator tanlash mumkin.

Qatordagi amallar

Qatorning istalgan joyini bosish xodim profilini ochadi. O‘ng chekkadagi ⋮ tugmasi esa uchta amalni beradi:

• Loyihaga biriktirish — xodimni loyihalarga va kategoriyalarga bog‘laydi. Qarang: Loyihalarga biriktirish.
• Menejer / Operator — rolni ikkinchisiga almashtiradi. Bu band faqat kompaniya egasida ko‘rinadi.
• O‘chirish — xodim hisobini butunlay o‘chiradi.

Tez qidirish

Yuqoridagi umumiy qidiruvga xodimning ismini yozsangiz, natijani bosish to‘g‘ridan-to‘g‘ri o‘sha xodim profilini ochadi — ro‘yxatni varaqlash shart emas.

Xodimlar soni va tarif

Yangi xodim tugmasi tarifdagi joylar soniga bog‘liq. Joylar tugasa tugma faolsizlanadi va ustiga olib borilganda nechta joydan nechtasi band ekani ko‘rsatiladi. Obuna muddati tugagan bo‘lsa, tugma sizni obuna sahifasiga olib o‘tadi.

Keyingi qadam

• Yangi xodim qo‘shish — hisob ochish va parol talablari.
• Rollar va huquqlar — Admin, Menejer va Operator nima qila oladi.
• Loyihalarga biriktirish — kim qaysi chatlarni ko‘radi.